5 Puisi Dian Purnama Dewi

  • By Dian Purnama Dewi
  • 22 Februari 2021
Pexels.com

Alas Tiangè Asri


Duh, jero.
Cingak, cingakin alas tiangè.
Taru-taru ajeg tur lestari.
Plawanyanè akèh mapilpil.
Bungannyanè mentik pakembang.

Angob manahè ngantenang, jero.
Tan wènten nè sakadi niki ring jagatè.
Alas tiangè rasmi tur asri.
Cihna bhakti ring Paramakawi.
Ngardi I manusa ririh matembang.

(Badung, 2021)

 

Ring Tengahing Wana


Ning, ning,
ning ring tengahing wana.
Irika ring batan taru bingin,
Ida rsi masila nyurat aksara,
mabasa Bali kuna.

Ning, ning,
ning ring tengahing wana.
Irika ring muncuk taru jati.
Sakancan paksi malomba macarita,
indik ulah idup I manusa.

(Badung, 2021)

 

Masekolah
    : kaatur ring alit-alitè


Tiang anteng masekolah.
Malajah peteng lemah.
Apang tiang prasida,
dadi jadma sanè maguna.

Tiang demen masekolah.
Timpal, liu tiang ngelah.
Ajak gradag-grudung maplalian,
utawi macanda, makedèkan.

Lan, lan, majalan ka sekolah.
Maguru melah-melah.
Ngalih bekel matinggah,
di guminè linggah.

(Badung, 2021)

 

Blabar Agung


Umah sebun ilang anyudang blabar.
Baburon malaib patikaplug.
Kedis-kedis makeber ngindang,
paling ngalih genah ngengsub.

Enggal malaib! Enggalang!
Langitè runtuh, alasè uwug.
Ulian tingkah manusa corah.
Ngenteb taru, ngutang leluu.
Kija laku alas asri nè malu?

Blabar agung di bucun dèsa.
Jadma pati, manah duka.
Waliang, waliang alasè ngrembun,
mangda sekala niskalanè landuh.

(Badung, 2021)

 

Mèmè


Mèmè, mèmè, tolih je tiang dini.
Guminè kena gerubug, basangè seduk ngerudug.
Kija, kija men lakun tiang mangkin malaib,
nyelamatang raga?

Mèmè, mèmè, tiang nyeh jejeh uli ibi.
I Madè kaplaibang ka Badung,
gelem sanget, kebus dingin, angkih-angkih,
ngemasin mati di tengah ambulan.

Kija kè mèmè magedi?
Las ngalahin pianak mèmènè dini,
uyak gering grubug agung, bedak seduk tanpa pangupa jiwa.
Kija kè mangkin tiang ngastiti?
I Bapa tuah ja saud mamunyi, ngopak ngambul sabilang wai.
Pianak mèmè kilang-kileng pagrèpè di tengah peteng.

(Badung, 2021)


TAGS :

Dian Purnama Dewi

Lahir di Amlapura tahun 1988 dan besar di Denpasar, Dian Purnama Dewi jatuh cinta pada buku-buku dan literatur sejak usia muda. Sejak dulu, ia gemar menulis puisi dan cerita pendek untuk beberapa media serta meraih penghargaan sebagai juara lomba. Kini, Dian menghabiskan sebagian besar waktu untuk mengajar Bahasa Indonesia, Inggris, dan Bali di Badung sambil menyepi dan tetap menulis sambil menerjemahkan.

Komentar