Sang Saraméya
By I Made Sugianto- 24 November 2024
Dugas pidan, ada bagawan suci mapeséngan Resi Pulaha lan Diah Sarama. Ida sampun suwé marabian nanging durung kapica oka. Ida makakalih raris ngrestiti, nunas ica ring Ida Sanghyang Widhi Wasa. Hyang Kawi asung kerta wara nugraha, Diah Sarama raris ngrempini. Ngancan sué, mobot idané ngancan ageng. Disampuné galah, embas oka tawah pisan, marupa kuluk.
Ida Resi Pulaha mawacana kapining rabiné mangda nerima sangkaning manah lascarya paican Hyang Kawi. Diah Sarama masemaya nyayangang okan idané salantang tuwuh. Okan idané kawastanin Sang Saraméya.
Diah Sarama ngemban oka sayang pisan. Gelisang satua, Sang Saraméya sampun kelih. Solahné sadu susila, bakti maring ibu aji. Kaceritang jani, Sang Saraméya ningeh orta Sang Prabu Janaméjaya makarya yadnya ageng di Kurusétra. Sang Saraméya dot ningalin karya agungé ento. Lantas Sang Saraméya matur maring ibu, pacang ningalin karya Sang Prabu Janaméjaya. Diah Sarama micayang okané ka Kurusétra sapisanan ngélingang apang Sang Saraméya ten nakal di genah sang matangun yadnya.
Liang pesan manah Sang Saraméya kapica ningalin yadnyané. Gelisang satua, jani suba neked di Kurusétra. Sang Saraméya ngalih tongos di bucu. Nepil ningalin pamargin yadnyané. Mih déwa ratu agung, angob pesan Sang Saraméya ningalin kaluihan yadnyané. Panjaké, cenik kelih tua bajang, luh muani pasliwer ngayah. Ada nglilit saté, nunu saté, nampah céléng, ada masih matanding banten.
Kacerita Sang Prabu Janaméjaya nitahang Sang Srutaséna nabdabang yadnyané apang mamargi antar labda karya sidaning tatujon. Sang Sutraséna sané kapica titah nglaksanayang swadharmané. Ida nyanggra pangayah kénten taler ngrerehang genah para uleman sané ngrauhin yadnya agungé. Ri kala nuréksanin wewidangan, Sang Sutraséna manggihin Sang Sarémaya nepil di bucu. Ida kalintang duka, raris ngambil saang, tur maekin Sang Saraméya. Sang Saraméya lantas katigtig kantos balan. Kaing-kaing Sang Saraméya naenang sakit lantas makaad uling Kurusétra.
Disubané teked di pasraman, Diah Sarama kagiat nyingakin okan idané nandang lara. Ida raris matakén ring Sang Saraméya. Sambil ngeling sigsigan, Sang Saraméya nyambatang katigtig antuk Sang Srutaséna.
“Titiang unik déwék letuh, nista, nika mawinan tiang nempil di bucu ningalin yadnya agungé. Titiang nénten clapat-clapat ring genah sang mayadnya. Tiang nempil di bucu raris kajagjagin. Tiang katigtig kantos balan, ibu.”
Mireng pasadun okané, tan sipi duka Diah Sarama. Digelis mamargi ka Kurusétra. Rauh ring payadnyan, bangras ida mabaos. “Ih Sang Prabu Janaméjaya iba. Dingehang pamunyin kainé jani. Saja agung yadnyan cainé, nanging maimpas tekén ané kaaptiang. Mapan kai ngelah pianak marupa asu kasakitin di tongosé dini. Ia mai tuah nolih yadnyan cainé. Sakéwala nyaman cainé ané maadan Sang Srutaséna nigtig pianak kainé ané tan padosa. Pih, sanget sajan ia nganistayang buron dekil, jani dingehang, kai mastu cai. Madak yadnyan cainé sing ngamolihang apa. Sing buwungan panca bayané katampi baan cai ajak makejang!”
Puput masabda, Diah Sarama ical saking Kurusétra. Ida Sang Prabu Janaméjaya kamegmegan, engsek, tan sida nyawis. Ngawit punika, Ida Sang Prabu Janaméjaya masabda, ten tados ngaplukin asu ri kala nangun yadnya.
Komentar