Kartika Panedenging Sari

  • By IBW Widiasa Keniten
  • 01 Oktober 2020
Foto: Tut Sugi

Olih: IBW Widiasa Kenitén

Purwakaning angripta rum,
Ning wana ukir,
Kahadang labuh ,
Kartika panedeging sari,
Angayon tengguli ketur,
Angringring jangga muré

 

Teges ipun: pangawit ngripta kalanguan, alas gunung, karerebin sabeh ri sasih Kapat (Kartika), wit sekaré sedeng masekar, ramia tengguli gending, sekadi bunga gadung sané nyurambiah.

Sapunika sang wikan ngimbayang sasih Kapaté. Sasih Kapat sering kaucap sasih miik. Sasih miik mawit saking pracihna katah wit sekar ngaturang sekar ring sarwa mauripé. Jagaté ngaturang kaayuan ring sang maurip. Sang maurip patut ngrumasayang rasa angayubagia ring Sanghyang Paramakawi santukan ring pailehan roras sasih wénten galah utawi sasih miik galah anggén ngamiikang wirasa angga.

Sang ngawangun karya ayu ngrereh sasih Kapat. Purnama Kapat pinaka pucuking sasih. Sanghyang Candra, Sanghyang Wulan, Sitangsu tan bina sekadi windu bunter ngururuh nada suara.  Ngwinduang rasa pikayunan ngrastitiang jagat, ngrastitiang angga mangda mrasidayang molihang kalanguan sajeroning hredaya. Hredaya langu, hredaya miik maprewerti ring pamargi kauripan. Kauripan sané manut ring unteng hredaya nyirnaang pikayunan tan manut. Pikayunan tan manut ngrusiting parajana. Mikobetin pamargi kauripan.

Wantah ring sasih Kasa, Karo, Katiga, jagaté rumasa panes. Daun – daun taruné katah luru. Sané pinih kanten wit jepun. Daunné luru ring sasih Kapaté mentik malih.

 Kasa, Karo, Katiga pamargin pitra yadnya kautamayang. Sang wikan nganikayang sanghyang Surya mamargi ngutarayana. Pamargin Sanghyang pitara ngruruh genah sané manut ring pamargi. Usan kapitra,karuntutin miik antuk sasih Kapat. Kapat ngepitang wirasa miik. Miik ning rasa, miik ning budhi cita. Budhi cita miik ngawetuang pamargi sane miik. Rumasa madrué urip.

Sang waged ring kakawian ngimbayang sasih Kapaté genah utawi galah ngruruh kalanguan. Sanghyang Manobu kapucukang mangda prasida ngaturang asebit kakawian ring kaulangunan. Alas, gunung, segara kakawi, karipta. Kaasrian, kaluihan, kadurgamanang alas gunung ngetus wirasa sang Kawiswara.

Sapunapi sekadi mangkin, alas gunung sané asri sampun sayan kirang? Kantun mrasidayang ngawi indik alas gunung? Santukan sampun kagentosin antuk hotél utawi panginapan?

Sang waged, widagda ring kakawian janten nénten kirangan imba, nénten pacang surud. Alas gunung, danu, sagara sekala sané asri kagentosin antuk kaasrian gunung, alas, danu segara ring hredaya. Ngulak-ngulikin kalanguan ring hredaya.  Bhuawana agung kaucap nunggal ring bhuwana alit. Sang mrasidayang nunggalang bhuwana agung-bhuwana alit tan bina nunggalang karasmianing kalanguan.

 

           


TAGS :

IBW Widiasa Keniten

Ida Bagus Wayan Widiasa Keniten lahir di Giriya Gelumpang, Karangasem. 20 Januari 1967. Lulus Cum Laude di Prodi Linguistik, S-2 Unud 2012. Tulisan-tulisannya tersebar di berbagai media massa berupa esai, karya sastra maupun kajian bahasa dan sastra baik dalam bahasa Indonesia maupun bahasa Bali. Cerpen-cerpennya pernah memenangkan lomba tingkat Nasional maupun provinsi.

Komentar