Lad
By IDK Raka Kusuma- 18 Januari 2020
Wiréh sing dadi singang, mantunné apang operasi ja. Wayan Suantara, lad bupati di kota tongosné jenek, nekain rumah sakit swasta di Dénpasar. Tetujoné, nakonang gedén prabéané, yén payu operasi. Makesiab Wayan Suantara maca angka ané matulis di kertasé. “Satus yuta. Déwa Ratu,” Wayan Suantara maclepeh ngraos, adéng, “Dija ngalih pipis amonto liunné?”
Pesu uli rumah sakit Wayan Suantara ngrasaang awakné baat. Baat ulian makeneh. Ngenehang pipis satus yuta.
Yén sing Putu Ardita, supir pribadinné ané ajaka uli teruna ngisiang, kéweh ia ningtingang awakné. Ningtingang, apang nyidaang menék tur nglejigang jit di korsi mobilné ané di arep.
Putu Ardita, sambil ngisi setir tur ngenjek gas, nyledét Wayan Suantara. Ningalin Wayan Suantara masebeng ucem, Putu Ardita nyeh ngajak ngorta. Sing bani ngenyit roko. Kapin kecap bibihné masem rasaanga.
“Satus yuta,” adéng Wayan Suantara ngraos. Kapin adéng Putu Ardita ningeh. Mabani takut Putu Ardita mancingin.
“Wénten napi Pak? Dados dingeh tiang bapak ngandikaang satus yuta?”
Wayan Suantara mendep. Mapan suba biasa ngajak Wayan Suantara kija-kija, Putu Ardita ngerti. Yén mendep, artinné dadi ajak ngraos. Artinné, dadi takonin unduk ané ngapelekang. Unduk ané ngranaang belbelan. Lantas, sing ngutang témpo, Putu Ardika buin mesuang pancingan. Sasidan-sidan, nabuhang pancingan, banban lan manis.
“Sakéng dumun, yén wénten pikobet, bapak ngarsaang tetimbang ring tiang. Wantah dados uning, napi pikobet sané meletang bapak?”
Wayan Suantara, ningeh raosné Putu Ardita kéto, nadaksara makebieng inget. Uli mara telung bulan dadi bupati, sakancan kakéwehan ané nepén déwékné setata timbanganga tekén Putu Ardita. Sing nyak ia matimbang wirasa ajak kurenané. Kurenané gelem jantung kronér, ngranaang ia nyeh nekedang kakéwehan ané nepén déwékné tur ngidih tetimbang. Inget tekén unduké ento, Wayan Suantara nekedang kakéwehan ané ngranaang sebengné ucem.
Maklesét raos di kenehné Putu Ardita, apang Wayan Suantara ngadep tanah utawi apa dogén ané dadi adep. Putu Ardita sing bani mesuang. Nyeh yén Wayan Suantara salah tampi. Maklesét buin raos di kenehné Putu Ardita, apang Wayan Suantara nyilih di bank. Nyeh masi nekedang. Krana telung bulan ané liwat ia ngatehang Wayan Suantara nyilih pipis di BPD. Ané pang telu, maklesét raos di kenehné, apang Wayan Suantara nyilih tekén sekancan pengusaha ané taén tulungina dugasé nu dadi bupati. Unduké ténénan tekedanga tekén Wayan Suantara. Wayan Suantara nyautin aji raos:
“Lek bapak, Tu.”
“Dados lek?”
“Kadéna bapak ngenténgang kamelahan bapaké ané suba liwat.”
“Ten ja kénten, Pak.”
“Yén sing kéto, kénkén?”
“Dumun pengusahané nunas tulung ring bapak, sinah ipun tepén pikobet. Mangkin bapak tepén pikobet, sampun sapatutné ngarsaang pitulung. Samaliha bapak ngarsaang pitulung ring sané naén tulungin bapak.”
Wayan Suantara mendep. Putu Ardita makenyem. Kenehné mabunga-bunga. Bapak mendep, kéto ia ngraos di keneh, artinné cumpu tekén tetimbang i déwéké. Artinné, i déwék tinggal ngantiang, kija orahina tekén i bapak.
Raosne Putu Ardita ané munyianga di keneh ento mabukti. Wayan Suantara ngorahin, yén suba teked di kota tongosné jenek, tongosné taén dadi bupati, apang ka perusahané Ketut Panca.
“Kénkén yén kemu?” Wayan Suantara ngidih tetimbang.
“Yén ten iwang, duk bapak kari dados bupati, bapak naen ngandikain tiang. Ketut Panca naen nunas ring bapak mangda kicén proyék. Yén ten iwang, bapak ngandikain tiang, bapak ngicén proyék wewangunan gedung kantor lurah. Akéhné tetiga.”
“Buat ento saja pesan. Ané idihang bapak tetimbang, pantes apa sing kemu nyilih pipis pinih malu?”
“Patut pisan. Pak Panca mangkin sampun dados kontraktor ageng. Samaliha bapak ngicén ipun proyék nénten ja sapisan. Yén petékin tiang, wénten pang dasa ipun tulungin bapak antuk proyék. Padaang ring pengusaha sios, ring ipun pinih akéh bapak mapica proyék.”
Wayan Suantara mendep. Lantas anggut-anggut. Suud kéto ngusap mua aji sapu tangan. Putu Ardita makenyem.
Teked di Gianyar, Wayan Suantara ngorahin Putu Ardita ka tongos langganané madaar uli ia mara nem bulan dadi bupati.
Sambil ngantiang nasi mabé guling, Wayan Suantara nadaksara inget tekén dagang koran teruna ané ngojog déwékné tur nanjaang koran. Kala ento, mara pangawit ia mabelanja ditu. Ia inget di pang limané madaar ditu, ngorahin anaké teruna ento apang nglimbakang dedagangan.
“Tiang ten ngelah modal, Pak,” anaké teruna ento masaut.
“Yén Gus nyak, baanga ya modal.”
Nepukin anaké teruna ento manggutan, Wayan Suantara ngorahin ajudané nyemak tasné di mobilé. Wayan Suantara inget, ia ngenjuhin pipis anaké teruna ento duang yuta. Wayan Suantara inget, suud ngorahang suksma lan niman limané, anaké teruna ento ngidih kartu adané. Wayan Suantara inget, anaké teruna ento nyesed nagih tulisang: di jalan apa ia nongos tur dija, mapan ngorahang sing ngelah kartu adan. Wayan Suantara inget, ajudané ngisinin pangidihné apang di kertas ané enjuhanga nulisang, laut ngenjuhin anaké teruna ento.
Kanti suud madaar ia inget tekén unduké totonan.
Teked di malun apotik di wates kauh kota tongosné jenek, Wayan Suantara ngorahin apang Putu Ardita sing engsap ka perusahan gelahné Ketut Panca. Sonder orahina pindo, Putu Ardita mélokang mobilé ka kébot lantas nerbéng beneng kaja. Buin limolas menitné mobilé suba teked di arep perusahané Ketut Panca. Putu Ardita ngenjek rim. Satondén tuun Wayan Suantara ngorahin Putu Ardita ngantiang di mobilé.
Tengan jam galahé majalan. Wayan Suantara tondén teka. Setimaan menit galahé majalan. Wayan Suantara teka.
Sarwi ngidupang mobil Putu Ardita matakon, “Sapunapi Pak, polih?”
Wayan Suantara sing masaut. Suba mobilé majalan duang kilo, mara Wayan Suantara mesuang pasaut.
“Sing maan, Tu. Ketut Panca ngorahang uli atiban perusahané sing maan proyék.”
Putu Ardita, mekeneh ngorahang bogbog. Nanging buung. Nyeh yén Wayan Suantara gedeg. Laut ngalih Ketut Panca tur matbat aji munyi sepet.
“Mangkin kija, Pak?” Suud kituk-kituk Putu Ardita nakonin Wayan Suantara.
“Ka perusahané Ali Syarifudin.”
Pajalané Wayan Suantara sig Ali Syarifudiné patuh tekén sig perusahané Ketut Panca. Lantas ka perusahané Gusti Ayu Laksmi, pocol. Ka perusahané Ida Bagus Anom, sing maan apa. Ka perusahan Déwa Putu Oka Ardana. Patuh. Sing maan apa. Ka perusahané Sang Madé Méndra. Sing maan apa masi. Ka perusahané Nining Bestari. Pocol. Kanti sanja guminé, Wayan Suantara tondén masi maan nyilih pipis. Marasa leleh, Wayan Suantara ngorahin Putu Ardita mulih.
Padalem bapak. Pedalem bapak. Dugasé nu dadi bupati sakancan ané tekaina ento pang kuda kadén tangkil ngidih proyék. Jani duga sing nyak nulungin. Padalem bapak. Padalem bapak. Tuah raosé ento ané sida sambata tekén Putu Ardita. Sambata di keneh.
Iseng Putu Ardita nyledét Wayan Suantara. Sebet ia nepukin Wayan Suantara nyédér di korsiné. Peluh pidit. Sebengné ucem tan kadi. Limané ngamel saputangan belus lépég. Ciri pangkuda-kuda anggona nyusutin peluh ané tan parérénan ngecah.
Padalem bapak. Padalem bapak. Buin Putu Ardita nyambat. Nu di keneh. Yén iraga té ngelah, iraga nulungin bapak. Sakéwala apa anggon nulungin? Ah, yén dugasé nu dadi bupati bapak nyak aji mumpung, miribang sing kakéné dadinné. Déwa Ratu! Kakéné dadin anaké dugasé kuasa jujuré kaliwat?
Putu Ardita buin nyledét. Tingalina Wayan Suantara bengong. Paliatné joh. Joh sawat. Nrawang sawang.
Komentar