Guna-guna Teruna
By IGG Djelantik Santha- 14 Januari 2020
Guminé mara nyaluk sanja. Jam dingding ané ada di kamar tamu mamunyi jangih maklenéng ping pitu. Pan Darsi ajak Men Darsi mara pesan suud madaar. Nyambi ngisis Pan Darsa iseng nyetél TV ané nyiarang Gunung Merapiné di Jawa maletus hébat pesan. Laharné masepuk uli puncak gunungé nguyak ajurang désa-désa ané ada disampihné. Para pangungsiné magrudugan malaib ngaba barang kasugihanné apa dogén ané dadi baana ngaba. Ada masih ané ngaba ubuh-ubuhan sampi, kambing. Nanging liu masih ané malaib ngaba awak dogén katungkulan paling ngalih pianak somahne biur nyelametang déwékné.
Ningalin kahanané buka kéto inget ia tekén dugas Gunung Agungé meletus tahun 1963 ané malu, dugas ia enu cerik ajaka ngungsi tekén reramanné ka Tabanan. Timpal-timpalné uli Desanné liu ané transmigrasi ka Sumatra, ka Sulawesi lan Kalimantan. Mémé bapa ajak adi-adinné mulih ka Désa sasubané gumi lan gunungé degdeg makajati mula. Amung Wayan Subudi utawi Pan Darsi ané tetep makuli di Tabanan. Jani ia suba ngelah panak tetelu, muani aukud luh dadua. Panakné ané paling kelih Luh Darsini suba ngantén tahun 2007 ngajak Gede Ngurah Pancala ulian katangkep Hansip mapésta inum-inuman keras di Hotel nganti nginep ulian télér tusing nyidayang mulih. Timpalné buin duang pasang enu nyidayang mulih yadiapin pati kaplug srayang-sruyung punyah ngutah-utah dirurungé. Enu aget sawiréh Luh Darsini lan Ngurah Pancala mara pesan lulus Akademi Pariwisata mawanan nyidayang pada maan gegaen di Hotél.
Adinné ané Luh paling cerik Komang Dartini enu mragatang kuliahné di Akademi Gizi, buin telu bulan lakar wisuda. Yén goba, mula sajaan Komang Dartini jegégan buin kaleman tekén Luh Darsini ané ngawénang truna-trunané liu ané muduhang. Dugasé mara lulus Ujian Nasional SMA ia maan buduh sakéng pepasangan truna uli Jawa ané ngajakin ia ngantén, nanging ia tuara nyak sawiréh ia lakar nglanjutang sekolahan ka Akademi Gizi. Komang Dartini dadi bingung tur mepes ngeling di pasaréanné nyambat-nyambat trunané pacarné ento. Pan Darsi séngeh tekén panakné kena santét, guna-guna pangenduh uli Jawa lantas ngalihang ubad ka Pak Kyayi nganti seger. Mara entegan sebengné sagét buin ada ngaruara. Gatot ané ngaku pacarné uli Jawa ento nadaksara buin kacunduk ajak Komang Dartini mulih uli SMA ngurusang surat-surat lakar naftar di Akademi Gizi. Mapi-mapi soméh ia nundikin saha ngusuhin palanné Komang Dartini ngajakin menék ka mobilné.
“Oh,Mang Tini apa mara mulih uli sekolah? Ayo menék atehanga nyen mulih, cang mungpung léwat.” Mang Tin amung makenyem lantas menék. Bayunné linglung alah daut.
Di mobilé ia ajaka ngorta kangin-kauh, baanga inuman téh botol nganti engsap tekén awak sagét suba teked di Gilimanuk. Sedek ngorta di lokét karcis panyebrangané teka Iwan Doni ngajak grupné maakin matadah noos angkihanné. Iwan Doni adan asliné I Wayan Dunia.
“Hé, Mang Tin lakar kija dadi menék mobil padaduanan ngajak Mas Gatot?”
“Ooh, dija né Iwan? Iyang nak ituni milu menék lakar mulih uli sekolahan. Dadi jeg sagét suba dini? Tulungin iyang Wan, mirib ia ngrencanaang lakar mlaibang iyang ka Jawa. Iyang sing nyak Wan,” kéto raosné Komang Dartini lantas tuun uli mobilé, ngeling. Iwan Doni nyemak baong bajunné Gatot tur jagura tangkahné saha nangtangin majaguran.
“Héé, kénkén keneh cainé Tot? Apa maksud cainé ngajak Mang Tin mai, sajaba lakar mlaibang ia ka Jawa? Yén makeneh kawin lari, sing kéné caranné. Yén di Bali ngarorod ento kalaksanayang saking pada demen. Ada éédanné, majati, ngluku, mlaku pelih, ... nganti makala-kalaan, mawidi-widana, majauman lan mapamit uli sanggah Luhé. Yén kéné jani lakar alihang cang polisi cai Tot,” raosné Iwan sada bangras, nagih nyagur.
“Oooh ndén malu Wan. Maksud cangé amung malali dogén nyang dua wai mulih. Yén kéné cara dini sing dadi, yaah maaf yén kéto. Tulung atehang Komang Tini mulihné. Cang sing bani kemo, nyanan matianga cang ditu,” raosné Gatot saha nyerahang Komang Dartini tekén Iwan Doni, lantas maserét nyebrang ka Banyuwangi. Iwan ajak timpal-timpalné ngandéng Mang Tini mulih ka Tabanan. Pan Darsi ajak kurenanné matur suksma banget tekén Iwan Doni ané suba nyelametang pianakné. Uli sekat ento Iwan Doni rajin malali kumahné Mang Tini. Ping kuda kadén ia ngalemesin Mang Tini apang nyak masuk di Buléléng tur dadi pacarné. Nanging Mang Tini tetep tusing maang jawaban pasti. Yadiapin ia merasa kapiutangan, nanging dasarné ia mula tusing demen tekén Iwan Doni.
Nanging buin nembulanné ia buin kena sakit tawah. Boya ja ngeling cara dugasé kena santét ngomélang ngalih pacarné, nanging jani pragat ngumik cara radioné masetél. Paningalanné ngidem, awakné lemet, munyinné pati kacuh ngomél buka raos laad timpalné ané ajaka masuk di SMA ipidan,ané nulungin ia kaplegandang, ané jani kuliah di Buléléng.
“Mang Tin, dadi ati Mang Tin buung milu masuk di Buléléng. Kadén anak luh cocokné dadi guru. Gaji guruné jani cukup, buina ada kapastian lakar maangkat dadi PNS. Kadén Mang Tin suba suud makabakan ajak Mas Gatot ané taen mlaibang Komang teked di Gilimanuk? Yén sing beli ané ngetut nambakin méhméhan suba dadi barang antik jani di Jawa? Apa kakurangan beliné Mang, sugih beli, dueg beli, bagus masih beli, apa buin? Yén uli halus Mang Tin sing nyak, SMS sing bales, télpon sing sahutin, nah kanggoang uli kéné beli ngacep ragan Komangé. Beli anak tresna banget, cinta bani ngetohang jiwa, beli. Né sedeng melaha ada foton Komangé anggon beli sarana. Beli maan uli santét seberang.
Ketogang suba pangléakan baliané dini amun sida baan nandingin ajian acep-acepané ténénan. Kanggoang uli joh. Yén paak sing buungan obat cara janiné lakar baang beli pang misi dogén keneh beliné,”keto raosné nguman-uman cara radio storing, nagih ngadu santét.
Pan Darsi bingung lantas buin nunas bantuan tekén Pak Kyayi, nanging tusing nyidayang mgandegang munyinné yén kadung kumat ngamélmél cara bangkéné mamunyi. Terus terang Pak Kyayi ngorahang yén ané ngaé panyakité ténénan ilmunné suba tegeh gati.
Ditu lantas Pan Darsi nunas baos tekén Jero Dasaran. Uli beras jinah ngenah yén keluarganné Pan Darsi suba makelo tusing taén pedek tangkil mintonang panakné ka Pura Kawitanné di Sebudi. Dadi ngaku agem dogén malu, lantas uli ditu lakar ada pawisik dija patutné nunas tamba. Inget tekén kapongoran Batara Hyang Guru, maninné Pan Darsi mulih ka Sebudi ngaku agem nyadia lakar nyumunin maturan ka Pura Kawitanné. Di Pura ada pawisik uli JroMangku apang Pan Darsi nunas tamba ring Ida Bagus Aji di Geria Sidemen. Di Geria Ida Bagus Aji amung mapaica tamba maserana jahé pahit kanggon nutuhin yéning kumat. Buin pidan yén suba seger mara ajak ka Geria lakar malukat. Amung maketelun maubad lantas Komang Dartini seger maka jati mula. Mara lantas kalanturang malukat lan malik sumpah saha ngaturang guru piduka ka Pura Kawitanné ngajak somah lan pianakné makejang.
“Béh, kéné ko yén anaké engsap tekén kawitan ané setata ngicén wara nugraha, tuntunan tekén sentanané pada makejang,” keto grenggengané Pan Darsi ajak Mén Darsi mapangenan. Sing tawanga panakné, Made Darsana sagét teka maclengus ngajak anak luh.
“Bapa, Mémé mungpung dini pada marerasan. Niki tiang ngajak gélan tiangé mulih Dayu Kadé Rupini, tuah lakar mragatang pula pali ngantén.Yén kénkén tata carané ané patut jalanang tiang nyerahang tekén Bapa ajak Mémé,” raosné Made Darsana papojolan. Mémé bapanné bengong tan pasaut, slengagan anggut-anggut cara patakut bungkut.
“Béh, Madé...Madé. Jag tan maa teka ngaba anak luh nagih ngantén, buina ngajak Dayu, wangsa brahmana. Sing nyanan kena kanda asu mundung, anglangkahi karang ulu?”
“Bapa, sujatinné Ajinné Dayu suba uning tiang mapacaran ajak Dayu. Saratné asal tiang nyak nyentana di Geria utawi ngantén pada gelahang, sawiréh Dayu Kadé Rupini anak tunggal, tusing ngelah sameton buin.Tiang ngoraang sing nyak sawiréh tiang masih muani padidi jumah deriki. Sajaba kéto rasanné soléh anak ngantén negen dadua nanging malénan wangsa,tusing masidikara.Kénkén anaké negen yéning tetegenané tusing adung?”
“Bapa, tiang jani maserah bongkotan. Kénkén ja melahné apang tiang tetep makurenan ngajak bli Madé, sawiréh jani tiang suba telu bulan ngadut panakné bli Madé. Yadiapin Ajin tiangé kapisereng apang tiang maan kurenan ulian ngantén pada gelahang.”
Kéto pinunasné Dayu Kade Rupini ngasab apang Pan Darsi lan Mén Darsi nyak mragatang pula pali penganténané sawiréh belinganné sayan gedé, apang tusing ngawé elek di jagaté.
“Béééh, Madé Darsana, kénten masih Dayu, sujatinné tiang sing ja lakar ngutang lan nganepin pianak. Nanging kaplegan lan bingung indik pinunasé apang ngantén negen dadua. Yén pada gelahang patut, artinné tut wuri handayani, tuara ngutang pianak yadiapin sampun ngantén ajak anak lén. Ané kadanin ngantén negen dadua sujatinné yén calon panganténé luh muani mula saling kodagang, makawitan tunggal, dadi saling sembah, saling parid. Yéning mani puan irerama pada séda/mati, mantuné luh lan muani kayang sentanané dadi nyumbah.Tur yén kanti nyekah lan mamukur lantas nuntun apang sida pada ngalinggihang di Mrajan Kembulan. Boya ja malénan,” raosné Pan Darsi matadah sedih.
“Napi bédanné tekén meras panak lan nyentana? Nguda bébasan?”raosné Darsana.
“Ento kéné Dé. Yén dadi pilihin melahan ane enu pasemetonan utawi pada wangsa né. Nanging yén tusing maan, nyén dogén dadi peras, utawi kaduduk mantu asal kulawarga nné pada lascarya. Artinné Dadianné ané meras utawi nuduk mantu nyak nerima anaké cerik utawi ané nyenata dadi kulawargané. Lan ané ngelah wirangé ané kaperas wiadin kaduduk mantu lascarya nglepas pasidikara lan hak warisné, rumasuk wangsanné,” kéto pituturné Pan Darsi alon apang pianak lan calon mantunné pada ngerti.
“Yén kénten Pa, lantas kénkén pamuput tiangé mangkin?” pitakonné Dayu Rupini.
“Nggih yén kénten, tan urungan patut pajatiang pajalané ngantén ngarorod. Sawiréh raga sampun pada dewasa, bébas nyalanang Hukum Perkawinan manut Adat lan Agama Hindu ané kasungkemin manut sastra dresta lan awig-awig ané patut kalestariang,” kéto munyinné Pan Darsi lantas nundén pianak lan mantunné nongos di kamar. Salanturné ia kumah Kliang Dusun / Banjaré ngalapor saha nunas tulung lakar majati ka Gerian Ajinné Dayu Kade Rupini indik okanné ngarorod sareng Made Darsana.
Sanjané sampun nyaluk peteng, munyin clepuké makuuk ngetaraang bulané kapangan sang Kalarau sayan makelo sayan ucem remrem katangkeb gulem. PE
,o0*&@&*0o.
Kesiman, Purnama 17 April 2011
Komentar