Smara di Gunung Péngsong
By DG Kumarsana- 10 Januari 2020
Gunung Péngsongé gadang suud kedasang baan ujan. Sujatiné boya ja gunung kaadanin, nanging suba kadung anaké makejang puru tamiu muah timpal-timpal ané demen malali kema ngadanin gunung.
“Ento maadan bukit, luh sayang jegég,” kéto abet tiangé sukat ngiket sutresna asih jak I Bulan.
“Tusing! Tusing. Ento maadan gunung, ento gunung Péngsong, cutetné ento gunung!” Bulan besus, kadirasa buka istilah gunung lan bukit daat gati koné cara ia ngartiang. Gunung mirib artiangé buka tonjolan gumi tongosné duuran, tonjolan ané éndépan cara ia asanang luwung adanin bukit. Nah, nget jag dingehang gén, kéto koné carané ngenehang. Lamun tungkasin pelih nyanan.
“Nah... nah gunung. Ento gunung luhé, sayang,” tiang ngalah. Ulian ngalah nak maan masé hadiah kecupan di pipin tiangé.
“Wéééé, luh sayang, sing dadi jaruh dini,” tiang nyaru-nyaru makelid kéwala munyungang bibih abedik, kenehé ja maang bibih kangguang pipiné dogén kecupé. Pipin tiangé ané bek laad jerawat masisa dugasé és-ém-pé. Nanging jani suba seger. Suba kedas lan nyalig bagus. Hm... nak seleg ngubadin baan acnol. Nanging tusing kénkén lamun ngalah ulian ngadanin gunung lan bukit carané Bulan koné daat ngartiang, tiang nak milu masé demen. Apabuin ngalah ulian bukit lan gunungné ia I Bulan, éh, maksud tiangé ngalah nampi sujatiné bukité mula ja melénan cara kenehné Bulan, gegélan tiangé ané jegég sing kodag-kodag, tiang milu masé demen. Saumpami bojog ané ngoyong ditu orahangé Anoman, rajané i bojog, tiang masé setuju, krana apa-apa ané cara Bulan ngorahang setata tiang masé milu ngorahang kéto, cutetné setuju gén, apang nyak ia demen, nget jag pasti Bulan lakar niman pipin tiangé buin. Nyén nawang ané jani lakaran maan bagian di bibih tiangé, héhéhé biasané saking ia kendel Bulan pelampiasané jag tiang sajan-sajan ngaé kesiab-kesiab bayuné. Ngaé runtag demen. Tiang lakar geluta jag nyajaang ia lan... ngok! Kéto munyiné. Lipstické ento lakar sinah ngendih melaad di muan tiangé ané bagus. Mih!
“Ngudiang nengil? Beneh ento gunung?” Bulan ngejutin, nadak kecag bengongé.
“Mih, mimih aa... Bulan, aa.... beneh ento maadan gunung. Saja mula kéto. Beneh sajan! Lamun bojoge ento apa adané ?” Tiang mancingin. Nyén nawang keneh tiangé nyak adung cara kenehné I Bulan.
“Bojog ya bojog!” Bulan masaut bedos.
Badah sanglir!. Pelih! Pelih!! Kadén kal nyak ngadanin Anoman, tiang lantas nyautin ‘benéh saja kéto’, péh sajan ento, Bulan. Tiang setuju sajan lan bibih ragané saling nyangket buka kemanisan karét, sing kelés-kelés, héhé pelih aa?!.
Yén nlektekin bojog-bojogé konyangan pada girang kecas-kecos di carang kayu bukité ento mangenin tiang jak Bintang, tunangan tiange ané malunan ané ilang kija kadén. Ilang uluh gumi. Boya ja krana bojogé ténénan dadi biang keladiné. Mula tiang taén pelih ngaraos dugas ngajak ia negak ditu ngeroman sambilang makpak jagung bakar. Meli jagungé di jalan Udayana dituan lan morbor jagungé di natah sisin wantilan pura bukit Péngsongé. Apang ngenah mesra lan ada satua bedik dadi sambilang morbor jagung gelut tiang ia I Bintang. Tuah ngelut tunduné dogén. Nak sing dadi ngeroman di paek jaba pura. Bisa sengkalén. Nak ngéngkén koné masé Bintang demen gati ajakin malali mai. Apa mirib sulurné. Mirib ia ngelah dedemenan menék gunung nganti ngelangenin nepukin natah bebukitan, kéwala sing nyak tiang ngorahang lamun Bintang numitis uli bojog mawinan shioné buron marupa bojog. Bah. Tusing kéto! Tiang sing mikirin ané tidong beneh, krana sujatiné Bintang bajang sekén-sekén jegég, nyalig, misi bedos lan demen ajak macanda. Jalir masé bedik. Muané putih kedas sing jerawatan buka muan tiangé pidan. Lan mimih, peningalané ento..., sajan-sajan leh gati. Nutdut keneh yan mekelo bakat tlektekang. Pantes suba reramané ngadanin Bintang. Mula saja mesib Bintang. Lamun ngedil tlektekang, ngancan tlektekang lan makelo tolih, tiang nget jak makita kual. Nanging eda kéto. Sing dadi kéto! Tusing Pantes. Sing matatakrama adané. Langgah! Apabuin liu bojog dini. Paglanyat kecok-kecog ningalin. Kondén pegat ngenehang matan luh Bintang ané luih, sajan ba! Bojogé ané gedénan nyamber jagungé ané sedeng borbor. Bintang nyerit-nyerit malaib. Tiang makesiab milu malaib, kéwala ngepungin I Bintang. Boya malaibin bojog.
Duh Bintang pelih adané nekepin jejeh buka kéto luh, ngudiang sing ka tangkah bliné malaib ngengkebang jejeh? Mimih luh Bintang sajan-sajan makesiab. Tiang milu makesiab lan bojogé tepuk nyengir kendel.
“Pih, naskeléng cai bojog!!” tiang nyacad.
“Apaaaaaa???? Nyén bojog naskeléng?” Sagetang Bulan nyegik di samping tiangé. Mimih, bes joh mangenin Bintang. Di samping tiangé Bulan. Boya ja Bintang.
Makesiab tiang. Nélik ia.
“Nyén ané orahang bli bojog?”
Tiang bengong cara nak belog.
“Nah orahang nyén bojogé ento?” Bulan maekin. Peningalané enu nelik. Lantas gimbelé paan lan liman tiangé.
“Hahahaha, wih.. Bulan, adéng-adéng malu. Sing dadi pedih buka kéto. Sujatiné tiang nak nepukin bojogé dadi nget jak ngelangenin inget pajumu pidan matemu tekéning luh jegég, Bulan makayangan. Inget pajumu ngiket tresna-asih ngajak luh jegég. Ento maadan “cinta monyét” héhé buka iraga né, Bulan...” Tiang ngapul-ngapulin apang suud pedih. Ngarumrum. Apang sing buin galak. Nanging mabading, Bulan ngancan galak. Ngancan pedih ia.
“Artiné sajan bli ngorahang tiang bojog?” Bulan ngancan gedeg buin misi ngimbel. Tusing suud misi nyagur lan nyambak bok tiangé. Mimih luh ténénan mabikas macan. Nyak nyocok cara shio buron macan. Sing bojog! Mimih, sakitné sing kodag-kodag. Bulan ngimbel lan memedih sing patuh cara pedihné I Bintang.
“Wé, sayang, ngudiang dadi memedih buka kéto? Maksud bliné “Cinta monyét” ento pajumu matemu smara, manyusup rasa, kéto! Inget sing dugasé luh pajumu matemu kaping bli? Semara bliné kaping luh, ukudan. Ento madan ‘cinta monyét”. First love héhéhé My first love only you, Tresnan bli kaping luh dogén, Bulan,” Tiang ngarumrum. Nyesed ngapul-apulin.
Bulan cengang, kéwala sing dengang. Bibihné enggang. Polos gati. Limané suud ngimbel. Peningalané ngancan ngabedikan nelik, busan cara matan barong tingalin.
Bulan bakat apul-apulin Mabukti ia makenyem. Cunguhné kebing-kebing mara orahang jegég, mirib Bulan. Nanging lamun ningalin Bulan makenyem buka kéto, tiang sing makita nolih bojogé di luanan ané taén kual dugas tiang ngajakin Bintang ngeroman pidan. Tusing! Sing nyak tiang matolihan ka bojogé ento. Nyén nawang mani puan Bulan ngadut apang sing pianaké lekad cara buron totonan. Hiii
TUAH MAWATES PETANG SASIH………….
Aa...tuah petang sasih semarané nékol. Pegat baan bucul. Apa bojogé ngranang kéto?. Sagetang Bulan ngaraos buka kéné:
“Wé Rejuna bagus genjing, ajanian suud ba malalinin tiang mulih nah!”
Uduh!
“Suud monto sebet. Enu liu bajang jegég angob di kotané ené. Nawang cai? Di guminé ené perbandingan anak muani kalawan nak luh abesik mabanding patpat,” Surya nylimurin keneh tiangé ané sebet.
“Somprét patpat mabanding besik, petan cainé!!??” Cureng tiang cunguhné. Surya masé ané ngenalang tiang tekén Bintang lan Bulan. Ia mula timpal ajak melah-melah uli masekolah pidan.
“Papat mabanding besik, telu bebalu...” besus tiang mesuang munyi ané sing pantes bakat pesuang. Nanging munyi ané suba bakat pesuang masé tusing pantes dingehang.
Surya ngisi tundun tiangé. Sada nak likad nlektekin. Daat adeng-adeng nyumunin ngaraos, mirib nyeh tiang lakaran salah tampi. Nyén nawang layahé nadak keseléo pelih ban ngomong.
“Wih, Rejuna, teruna solah, déolas lamun dadi idih cang, suudang malu bikas cainé ané jelé,” Adéng-adéng Surya mamunyi.
“Maksud cainé apa”
“Naahhh, apa ja kekuangan timpalé maadan satya matimpal lamun nyak nuturin jelé melah. Kéto artiné satya matimpal sajan-sajan ané sujati,” Surya ngalanturang apang raosnyané ané pesu uli bungutné anggapa matatwa.
“Aa, apaaaaa perah apaaaaaa?” Sing sabar tiang. Mih! Sajan-sajan icing truna Rejuna ané sing ngelah kasabaran. Makita mentangin busur panahé lan nebek bulan purnamané ento apang ngetélang yéh mata. Yéhmatan sebet ulian tresna pasranting. Tresnan tiangé ané mamocol, lan ocem. Buncul! Sajan-sajan buncul.
“Ilangang malu perah cainé ané demen ngentut di aap anaké liu apabuin di aep anaké luh bajang. Monto dogén!”
Tiang tengkejut.
Berarti ené koné ngranang ngudiang Bintang lan Bulan nadak sing ada ujan sing ada angin megatang sutresna asih ané sujatiné lakarang tepukin rahayu bagia. Mimih, dewa ratu...... kadénang ulian bojg-bojogé ento.
Boya ulian bojog, cara ané bakat kenehang tiang. PE
Komentar