Klangen Ngeberang Angen, Sesimbing Nguber Angen

Pupulan Satua Bali Modérn ‘Klangen Ngeberang Angen’ pakaryan Madé Suar Timuhun puniki madaging 13 satua cendet. Akéhan nyritayang pikobet sadurung lan salami pandemi Covid-19. Caritané prasida nuldulin kayun sang ngwacén. Penyuluh Bahasa Bali puniki waged ngracik bun satua. Sakadi kawagedan dané dados koki sakantun makarya ring hotél. Carita sané karacik marasa manis, lalah, sepet, ngranayang sané ngwacén grimutan, gedeg, sedih, tur metu rasa asih.  

Sinalih tunggil murda carita ‘Ulian Virus Corona Tiang Luntang Lantung’ nyritayang indik sebet makarya ring hotél. Santukan tamiu sepi, pegawai raris ‘karérénang. Sinah sampun pikolih utawi gajih ngamis nyenikang, wénten masih ten polih gajih. Majanten sampun nénten sida malih madunungan ring kontrakan, raris mawali budal ka désa. Neked di désa waluyaning cicing berung, sami ngejohin, santukan jejeh keni iusan kantos lalahan virus. Dini ditu katundung. Napi malih braya sané budal saking kapal pesiar utawi PMI, cendek tundéna jenek di tongos karantina.

‘Mrana Covid Sané Ngentenin’ sakadi pabasen tekéning kramané. Amongkén ja sakaya uli pariwisata, dharma pamaculan tetep ajegang. Mabukti pariwisatané kenyih. Ri kala bom Bali majedar, turis sepi ka Bali. Akéh krama sané makarya ring pariwisata kilangan pakaryan. Pamuputné mulih ka désa, magaé ka carik. Napi malih dugas pandemi Covid-19, sami enten, sané ten maduwé tegal carik, kanggéanga maabian ring paso, telajakan umah, muang teba. Ané pidan bet prajani kedas maimbuh dadi abian. Ri sampuné aab jagat kabaos kajatimula, malih kramané mlaibin geginan mamacul. Klangen Ngeberang Angen sakadi sesimbing, nguber angen.